Kamala Harris yanze ibyo kuganirira na Trump kuri televiziyo

Kamala Harris, uri imbere mu bahabwa amahirwe yo guhagararira ishyaka ry’abademokarate mu matora ya Perezida wa Leta Zunze Ubumwe za Amerika, yanze kwitabira ikiganiro kuri Fox News hamwe na Donald Trump, umukandida mugenzi we. Kamala Harris yavuze ko atazaganira na Trump kuri Fox News mu gihe azaba ataritabira ikiganiro cya mbere cyari giteganyijwe kuri ABC News.

Ku wa Gatanu, Trump yari yatangaje ko yiteguye kuganira na Harris tariki 4 Nzeri kuri Fox News. Icyakora, gahunda yari ihari isanzwe izwi ni ikiganiro kizahuza aba bombi tariki 10 Nzeri, nubwo Trump yagiye yumvikana kenshi abyanga, avuga ko iyo televiziyo yegamiye kuri Kamala Harris. Uruhande rwa Kamala Harris narwo ruvuga ko Fox News yegamiye kuri Trump.

Itsinda rishinzwe kwamamaza Kamala Harris ryashyize hanze itangazo kuri uyu wa Gatandatu rigira riti: “Trump akeneye kureka gukina imikino, akazabanza kwitabira ikiganiro twari twemeje mbere.” Bavuze ko ikiganiro cya ABC News aricyo kigomba kubanza, ibindi bikaza nyuma.

Ikiganiro cyaherukaga ni icyahuje Trump na Joe Biden muri Kamena, cyarangiye Trump ahabwa amahirwe menshi yo gutsinda kubera uburyo yacyitwayemo. Joe Biden, nyuma yo kwitwara nabi, yaje kwivana mu bahatanye ashyigikira Kamala Harris usanzwe ari Visi Perezida.