Intsinzi ya Paul Kagame mu matora yashimangiwe na Komisiyo y’Amatora

Mu cyumweru tariki 18 Nyakanga 2024, Komisiyo y’Igihugu y’Amatora yatangaje amajwi y’agateganyo mu matora yari yateguwe muri Rwanda, aho Paul Kagame, Umukuru w’Igihugu wari watanzwe n’Umuryango FPR Inkotanyi yatsindiye kuyobora u Rwanda agize amajwi 99.18%.

Muri icyo gihe, amatora yari yegukanye tariki 14 ku Banyarwanda baba mu mahanga na tariki 15 Nyakanga 2024 ku batuye imbere mu gihugu. Imibare y’agateganyo igaragaza ko Dr. Frank Habineza wa Democratic Green Party of Rwanda yagize 0.50% mu gihe Mpayimana Philippe yamamaje nk’umukandida wigenga yagize amajwi 0.32%.

Amajwi ya mbere y’ibanze yatangajwe ku mugoroba wa tariki 15 Nyakanga 2024, aho yagaragazaga ko Paul Kagame ari we uri imbere n’amajwi 99.15%. Hari hakiri amajwi asaga miliyoni ebyiri atari yakabaruwe.

Odda Gasinzigwa, Perezida wa Komisiyo y’Amatora yavuze ko muri Banyarwanda 9,071,157 bagombaga gutora, abatoye bose ari 8,907,876. Abatoye neza ni 98.07% mu gihe imfabusa ari 0.14%.

Gasinziga yavuze ko amajwi ya burundu azatangazwa bitarenze tariki 20 Nyakanga 2024. Mpayimana na Habineza bari bahatanye na Paul Kagame bemeye ko batsinzwe, ndetse bashimira uwabatsinze bamwifuriza ishya n’ihirwe.

Paul Kagame, w’imyaka 66, yatangiye kuyobora u Rwanda muri Werurwe 2000 mu buryo bw’inzibacyuho. Mu 2003 nibwo yatorewe manda ya mbere mu matora ya mbere yari abaye nyuma ya Jenoside yakorewe Abatutsi.