Imbere ya Perezida Kagame Amavubi yanganyije na Nigeria

Mu mukino wo gushaka itike y’Igikombe cya Afurika cya 2025 wabereye kuri Stade Amahoro, Amavubi yanganyije na Nigeria 0-0.

Ni umukino udasanzwe mu mateka y’u Rwanda kuko ari wo wa mbere waberaga kuri iyi stade ivuguruye, yakira abantu ibihumbi 45. Nyakubahwa Perezida Paul Kagame yari mu barebye uyu mukino, ushyira umukino wa kabiri mu matsinda mu buryo bukomeye.

Amavubi, yari imbere y’abafana ba yo, yagaragaje imbaraga mu mukino utari woroshye nubwo nta kipe yabashije kureba mu izamu ry’indi. Umutoza Frank Spittler yari yahisemo impinduka imwe, aho Mugisha Bonheur yasimbuye Rubanguka Steve muri 11 babanjemo. U Rwanda rwakinnye neza mu minota ya mbere, aho Mugisha Gilbert na Jojea Kwizera bagiye banyuzamo bagashaka kureba mu izamu ariko bikanga.

Ku munota wa mbere, Mugisha Gilbert yagerageje ishoti ryanyuze hanze y’izamu, naho ku munota wa gatanu umunyezamu Ntwari Fiacre yakuyemo ishoti rikomeye rya Wilfred Ndidi wa Nigeria. Ku munota wa 36, Amavubi yongeye kugira amahirwe ubwo Chukwueze wa Nigeria yakubise umutambiko w’izamu, ariko Lookman asubizemo umupira biranga.

Mu gice cya kabiri, Nigeria yakoze impinduka zikomeye ubwo Simon Moses na Victor Osimhen binjiraga mu kibuga. Gusa Amavubi yakomeje kwihagararaho, umunyezamu Ntwari Fiacre agaragaza ubuhanga mu kurokora ikipe ye inshuro nyinshi. Amavubi yahushije uburyo bw’ibitego, harimo ishoti rikomeye rya Mugisha Bonheur ryakuwe n’umunyezamu wa Nigeria.

Umukino warangiye amakipe yombi agabanye amanota, Nigeria ikomeza kuyobora itsinda n’amanota 4, naho Amavubi akagira 2. Umukino ukurikiyeho uzaba hagati ya Libya na Benin.

Abakinnyi babanjemo

Amavubi: Ntwari Fiacre, Omborenga Fitina, Niyomugabo Claude, Mutsinzi Ange Jimmy, Manzi Thierry, Mugisha Bonheur Casemiro, Bizimana Djihad (C), Muhire Kevin, Kwizera Jojea, Mugisha Gilbert, Nshuti Innocent.

Nigeria (Super Eagles): Stanley Nwabali, William Troost-Ekong (C), Ola Aina, Semi Ajayi, Bruno Onyemaechi, Calvin Bassey, Wilfred Ndidi, Fisayo Dele-Bashiru, Ademola Lookman, Samuel Chukwueze, Victor Boniface.