Imbamutima z’Aborozi: Uburinganire n’Ubwuzuzanye nk’Intwaro y’Iterambere

Aborozi b’inka bo mu Turere twa Nyagatare, Musanze na Ruhango bemeza ko inyigisho ku buringanire n’ubwuzuzanye mu muryango byabahinduriye ubuzima bikabafasha kugera ku iterambere. Niyonzima Eric n’umugore we Nyiramana Jacqueline bo mu Murenge wa Kinigi bavuga ko mbere yo kwiga uburinganire n’ubwuzuzanye bahoraga mu mirwano, ariko ubu babanye neza kandi batera imbere.

Izi nyigisho zitangwa n’umushinga RDDP uterwa inkunga na IFAD, ukaba ushyirwa mu bikorwa na MINAGRI. Zifashisha uburyo bwa GALS (Gender Action Learning System) bwo gushimangira ihame ry’uburinganire n’ubwuzuzanye hakoreshejwe ibishushanyo.

Mukanyandwi Donatha wo mu Karere ka Ruhango yavuze ko umugabo we yahoraga mu kabari ariko ubu yita ku rugo kandi barateye imbere. Nkerabigwi Faustin nawe yavuze ko mbere yo kwiga GALS yitwaraga nabi ariko ubu abanye neza n’umugore we kandi babona umusaruro mu bworozi bwabo.

Kagwera Teddy wo mu Karere ka Nyagatare yavuze ko mbere batabanye neza ariko nyuma yo kwiga GALS babayeho neza kandi bakorera ku ntego. Rumanzi George nawe yavuze ko yihishaga ibintu byinshi ariko ubu afatanya n’umugore we bakaba barateye imbere.

Aba borozi bibumbiye mu matsinda y’ubworozi bahamya ko kubera inyigisho za GALS abagore n’abagabo babona amahirwe amwe bigatuma umusaruro w’umukamo wiyongera. Leta y’u Rwanda ikomeje gushyira ingufu mu guteza imbere ihame ry’uburinganire n’ubwuzuzanye kuko bigira ingaruka nziza ku bukungu n’imibereho myiza mu gihugu.