Imbamutima za Musengimana wahanze indirimbo ‘Azabatsinda Kagame’ yakunzwe cyane mu kwamamaza umukandida wa FPR Inkotanyi Paul Kagame

Musengimana Beatha, umuhanzi w’indirimbo “Azabatsinda” yamamaza Paul Kagame wa FPR Inkotanyi, ahamya ko inzozi ze zo gutaramira imbere ya Perezida Kagame zabaye impamo.

Musengimana yavuze ibyishimo byinshi aterwa n’intsinzi ya Paul Kagame. Yagize ati, “Urebye ibyishimo mfite ntabwo bigira ingano, gutorwa kwa Perezida Kagame byashimangiye ko ntahanuye ubuhanuzi bw’ibinyoma, mpanga iriya ndirimbo bwari ubuhanuzi kandi rwose bwarasohoye.”

Musengimana yashimiye Imana yamufashije gutaramira imbere ya Perezida Kagame, ati, “Mwarabibonye ko nataramiye imbere ya Perezida Kagame ubwo yiyamamarizaga mu Karere ka Kicukiro, uriya munsi natashye nishimye kandi rwose naranyuzwe. Zari inzozi zanjye kuva cyera gutaramira imbere ye, rero kiriya gihe zarasohoye.”

Musengimana  yahamije ko kimwe mu byo bifuza ari uko bazabyinana na Perezida Kagame intsinzi mu gihe yazongera gutorerwa kuyobora u Rwanda mu matora ategerejwe muri Nyakanga.

Ati, “Icyifuzo cyacu ni uko twazabyinana intsinzi na Perezida Kagame, n’ubwo n’iyi ndirimbo ari iy’intsinzi ariko tuzaba dufite indi noneho tubyinane nawe twishimira intsinzi.”

Musengimana yavuze ko Itorero ryabo rigizwe n’ababyeyi b’abahinzi badafite ubushobozi, bakeneye ubufasha kugira ngo bagere ku rwego rw’Igihugu. Yagize ati, “Iri Torero turi abahinzi, nta kintu dufite uretse kuba twararihanze dufite ubushake, twikoshereje ingoma twicurishiriza amayogi byibuza ubu dufite ijana, ariko dukeneye inkunga y’Itorero. Urugero nk’ubu nta myenda dufite, uwaduha nk’imyenda, uwaduhamagara tukajya tugenda dusa.