NEWS
Igihe umukino wa Rayon Sports na APR FC uzabera cyamenyekanye
Nyuma y’igihe kinini hariho urujijo ku gihe Umukino w’Umunsi wa Gatatu wa Shampiyona y’u Rwanda ugomba guhuza Rayon Sports na APR FC uzakinirwa, wamaze gushyirwa tariki ya 7 Ukuboza 2024.
Tariki ya 14 Nzeri 2024 ni bwo Rayon Sports yagombaga kwakira ikipe ya APR FC kuri Stade Amahoro, ariko ntiwakinwa kuko Ikipe y’Ingabo z’Igihugu yakinaga imikino ya CAF Champions League.
Rwanda Premier League yabanje kugaragaza ko uyu mukino wakinwa tariki ya 19 Ukwakira, ariko APR FC ibyamaganira kure ivuga ko yabanza gukina ibindi birarane by’Umunsi wa Mbere n’uwa Kabiri.
Amakuru avuga ko uyu mukino wamaze gushyirwa tariki ya 7 Ukuboza 2024, cyane ko nta yindi mpamvu ihari yatuma utaba. Amakipe yombi agomba gutangira kuwitegura.
Rwanda Premier League yanabajije Minisiteri ya Siporo niba Stade Amahoro yaboneka kuri uwo munsi, kugira ngo abe ari ho umukino uzakinirwa.
Biteganyijwe ko kandi Rwanda Premier League izasohora ingengabihe ivuguruye, igaragaza ko umukino w’Umunsi wa 12 wa Shampiyona uzahuza APR FC na Police FC uzimurwa, kuko igihe wari kuzabera Amavubi azaba ari kwitegura umukino w’amajonjora ya CHAN 2024 ruzasuramo Sudani y’Epfo.