Ibyaranze urubanza rw’abashatse guhirika Perezida Tshisekedi

Ku wa gatanu abantu 51 bagejejwe imbere y’urukiko rwa gisirikare rwateraniye muri gereza ya gisirikare ya N’dolo mu murwa mukuru Kinshasa bashinjwa ibyaha birimo iterabwoba, kwica, gutunga intwaro bitemewe n’ibindi.

Muri uru rubanza rwatambutse kuri televiziyo y’igihugu rurimo kuba, abaregwa bagaragayemo abagore bane, naho abasigaye ni abagabo.

Iyi ntangiriro yibanze ahanini ku kwemeranya ku myirondoro y’abaregwa, bagizwe n’abanyecongo n’abanyamahanga, bose babwiye abacamanza ba gisirikare imyirondoro yabo.

Mu baregwa harimo Abanyamerika batatu: babiri bavukiye muri leta ya Utah – barimo Marcel Malanga umuhungu w’uwari uyoboye iki gitero – n’umwe wo muri leta ya Maryland. Barimo kandi umunya-Canada umwe ukomoka muri Congo.

Hagaragajwe imbunda icyenda za AK-47, akadege ka drone, imyenda ya gisirikare, ibikoresho by’itumanaho bya talkie-walkies, n’amabendera y’ikitwaga Zaïre, ubu ni Repubulika ya Demokarasi ya Congo, aba bantu bari bafite muri icyo gitero.

Habaye kwemeza ko babiri mu bari bagize iri tsinda ryateye ku biro bya perezida wa DR Congo n’urugo rwa Vital Kamerhe bapfuye kandi batazakurikiranwa, abo ni: Christian Malanga wari uriyoboye, n’uwitwa Aboubakar. Uburyo bapfuyemo ntabwo bwagarutsweho birambuye hano.

Ubushinjacyaha bwasomeye abaregwa ibyaha bashinjwa: iterabwoba, gutera, gutunga intwaro binyuranyije n’amategeko, kugerageza kwica, gucura umugambi mubisha, kwica, no gutera inkunga iterabwoba.

Lt-colonel Alpha Limbaya yabwiye BBC ko bimwe muri ibi byaha amategeko abiteganyiriza igihano cy’urupfu.

Abaregwa uyu munsi ntibahawe umwanya wo kwiregura kuvuga ku byo baregwa, nyuma y’impaka ndende urukiko rwanzuye ko uru rubanza ruzakomeza ku wa gatanu w’icyumweru gitaha tariki 14 Kamena 2024.

Abaregwa barimo abafashwe bamaze gukora igitero cyo ku itariki 19 z’ukwezi gushize kwa Gicurasi, hamwe abafatiwe ahandi i Kinshasa bashinjwa ubufatanyacyaha.

Abanyecongo barakibaza ibibazo birimo uburyo aba bantu babashije gutegura iki gikorwa mu murwa mukuru, bagatera urugo rwa Vital Kamerhe mu gace karindwa cyane ka Kinshasa hagashira isaha ataratabarwa nk’uko umugore we yabivuze, no gutera ibiro by’umukuru w’igihugu biri muri 1,2km uvuye kwa Vital Kamerhe, bagafata ibyo biro bitabagoye. Bamwe biteze ibisubizo muri uru rubanza rushobora kuzakurikiranwa cyane muri Congo no hanze yayo.

Imwe mu miryango y’abanyamahanga bari baregwa muri uru rubanza yagiye ivuga ko itazi amakuru y’abayo bafungiye i Kinshasa.