Harakurikiraho iki nyuma yo guhura kw’abashinzwe ubutasi b’u Rwanda, RDC na Angola?

Nyuma y’inama yahuje inzobere mu butasi bw’u Rwanda, RDC, na Angola ku itariki ya 7-8 Kanama 2024 i Luanda, ubu hategerejwe raporo y’ubusesenguzi bw’ibikorwa byo gusenya umutwe w’inyeshyamba wa FDLR. Iyi raporo igomba gushyikirizwa abaminisitiri b’ibi bihugu bitarenze itariki ya 15 Kanama 2024.

Intumwa za RDC zari zatanze isezerano ryo kwerekana uburyo FDLR izasenyerwa, kandi ibi byemejwe mu itangazo ry’inama yabaye tariki ya 30 Nyakanga 2024.

Raporo y’ubusesenguzi izakoreshwa mu gufata umwanzuro mu nama iteganyijwe kongera guhuza abaminisitiri b’ibi bihugu muri Angola bitarenze uku kwezi kwa Kanama 2024.

Niba umugambi wo gusenya FDLR wemeranyijweho, bizasaba ko Leta ya RDC irwanya uyu mutwe, mu gihe u Rwanda narwo rurinda imbibi zarwo kugira ngo hatagira abarwanyi bawo baza guhungabanya umutekano w’u Rwanda. Ibi bikorwa bizagenzurwa n’urwego ruhuriweho n’ibi bihugu ruyobowe na Angola, hashingiwe ku myanzuro y’inama ya Luanda.

FDLR imaze imyaka irenga 25 ikorera ku butaka bwa RDC, aho ikomeje kugira uruhare mu bibazo by’umutekano muke mu karere, birimo no gufatanya n’ingabo za RDC mu kurwanya umutwe wa M23. Raporo n’imyanzuro bitezwe bishobora kugira uruhare rukomeye mu guhindura uburyo iki kibazo kiganirwaho kandi kigakemurwa mu karere.