Gicumbi: Nyuma yo kunywa amacupa 11 y’inzoga umusore yabonetse yapfuye

Umusore w’imyaka 25 witwa Nemeyimana Phocas yasanzwe yapfuye ku muhanda hafi y’urusengero mu murenge wa Cyumba, akagari ka Muhambo, mudugudu wa Rugerero. Birakekwa ko yishwe n’inzoga yitwa Nesha yari amaze kunywa amacupa 11.

Nk’uko amakuru abivuga, Nemeyimana yari ari mu kabari aho mugenzi we w’imyaka 24 yamutegeye kunywa amacupa 13 y’inzoga ya Nesha. Yanyweye amacupa 11 gusa, ariko atangira gucika intege ari nabwo yasohokaga ngo atashye, nyuma akaza gusangwa ku muhanda yapfuye.

SP Mwiseneza Jean Bosco, umuvugizi wa Polisi y’u Rwanda mu Ntara y’Amajyaruguru, yavuze ko iperereza rikomeje kugira ngo hamenyekane icyateye urupfu rwa Nemeyimana. Abantu babiri bakekwaho kugira uruhare muri uru rupfu batawe muri yombi bakaba bashyikirijwe RIB sitasiyo ya Byumba.

Ati “Harimo gukorwa iperereza ngo hamenyekanye icyamwishe, hafashwe abantu babiri bacyekwaho kuba nyirabayazana w’urupfu rwa nyakwigendera bashyikirijwe RIB sitasiyo ya Byumba”.

SP Mwiseneza yasabye abaturage gutanga amakuru ku gihe mu gihe babona ikintu cyose gishobora gushyira ubuzima bw’umuturage mu kaga. Umurambo wa nyakwigendera wajyanywe ku bitaro bya Byumba gukorerwa isuzuma.