Gen Nyakarundi yasuye Ingabo z’ Rwanda ziri muri Centrafrica

Umugaba mukuru w’ingabo zirwanira ku butaka za RDF, Maj Gen Vincent Nyakarundi, yasuye ingabo z’u Rwanda ziri mu butumwa bwa MINUSCA muri Repubulika ya Centrafrica (CAR) ku cyumweru.

Maj Gen Nyakarundi yaganiriye n’abapolisi n’abasirikare b’u Rwanda bakorera mu butumwa bwo kubungabunga amahoro no mu bufatanye bw’ibihugu byombi hagati y’u Rwanda na CAR.

Mu kiganiro cyabereye mu birindiro bya Rwanbatt, Maj Gen Nyakarundi yashimye umurava n’ubwitange bw’ingabo z’u Rwanda mu kurinda abaturage no kubungabunga umutungo muri CAR.

Yagaragaje ko yishimiye cyane uburyo abasirikare b’u Rwanda bakomeje gusohoza inshingano zabo neza, anabagezaho amakuru y’uko umutekano wifashe muri rusange mu karere.

Yashimangiye ko uruhare rw’ingabo z’u Rwanda mu kurengera abaturage muri CAR ari indashyikirwa, kandi abashishikariza gukomeza kurangwa n’ubunyamwuga mu gusohoza inshingano zabo kugira ngo basohoze neza amasezerano y’ubufatanye hagati ya Loni n’ibihugu byombi.