Gakenke: Abantu 80 bafashwe bari gusengera mu Kibuti cy’inkoko

Ku wa 30 Nyakanga 2024, ahagana saa yine n’igice z’amanywa, abaturage bagera kuri 80 bo mu Murenge wa Gakenke, mu Karere ka Gakenke bafatiwe mu kibuti cyororerwamo inkoko barimo gusenga mu buryo bunyuranyije n’amabwiriza y’ahakwiriye gusengerwa.

Inzego z’umutekano zabajyanye ku Biro by’Umurenge wa Gakenke kugira ngo baganirizwe ku mabwiriza agenga ahemewe gusengerwa, cyane ko ngo bari basanzwe basengera muri iyo nzu yororerwagamo inkoko.

Aya makuru yemejwe n’Umuyobozi w’Akarere ka Gakenke, Mukandayisenga Vestine, aho yavuze ko aba bantu bafashwe basenga mu buryo butemewe, bityo bajyanywe kwigishwa hanyuma basubire mu miryango yabo. Yagize ati, “Abaturage turabigisha basubire mu ngo zabo cyane ko muri iyi minsi turi kugenzura insengero zikora, izigisha ibintu biyobya abaturage. Niba abantu bajya gusengera ahantu hadasobanutse mu kiraro cy’inkoko biteye isoni, kuko harimo abafite abana bakiri bato kandi dufite igihugu kigendera ku mategeko. Inyigisho bakeneye ni nyinshi, ibaze kujya gushakira Imana mu kiraro cy’inkoko.”

Abafashwe bajyanywe ku Murenge wa Gakenke guhabwa inama no kwibutswa amabwiriza agenga ahemerewe gusengerwa, nyuma bakaza kurekurwa bagasubizwa mu miryango yabo.

Ibi kandi bibaye mu gihe mu Turere tugize Intara y’Amajyaruguru harimo gukorwa umukwabu wo gusura insengero harebwa niba zujuje ibisabwa, birimo isuku, gusengera mu nsengero zuzuye, kuzishyiraho imirindankuba, kureba niba abayobora amadini n’amatorero bafite ubushobozi n’ubumenyi buhagije n’ibindi. Ibi bibaye mu gihe mu Karere ka Musanze hamaze gufungwa izigera ku 185 zitujuje ibisabwa.