Dosiye y’uwari ku rutonde rw’Abadepite ukurikiranyweho icyaha cya Jenoside igezehe ?

Urwego rw’Igihugu rw’Ubugenzacyaha RIB, rwatangaje ko dosiye ya Musonera Germain ufite imyaka 59 wari ku rutonde rw’abakandida-depite akekwaho icyaha cya Jenoside yakorewe Abatutsi yashyikirijwe Ubushinjacyaha.

Musonera Germain yatawe muri yombi ku wa 21 Kanama 2024, akekwaho icyaha cya Jenoside yakorewe Abatutsi muri Mata 1994, aho akekwaho kugira uruhare mu rupfu rw’umugabo witwa Kayihura Jean Marie Vianney, wishwe mu gihe cya Jenoside yakorewe Abatutsi.

Umuvugizi w’Urwego rw’Ubugenzacyaha, Dr Murangira B. Thierry, yatangarije IGIHE  dukesha iyi nkuru ko dosiye ye yamaze gutunganywa ikanoherezwa mu Bushinjacyaha ku wa 26 Kanama 2024.

Yagize ati “Ku wa 26 Kanama 2024 dosiye iregwamo Musonera Germain yoherejwe mu Bushinjacyaha ku rwego rw’Ibanze rwa Kiyumba aho akekwa kuba yarakoreye icyaha cya Jenoside yakorewe Abatutsi mu 1994 mu cyahoze ari komini Nyabikenke.”

Bikekwa ko icyaha akurikiranyweho yagikoreye mu yahoze ari komini ya Nyabikenke ubu akaba ari mu Murenge wa Kiyumba mu Karere ka Muhanga.