Depite Justin Bitakwira Arashinjwa Gushishikariza Mai Mai Yakutumba Gukora Ubwicanyi ku Banyamurenge mu Ntara ya Kivu y’Amajyepfo

Mu gace ka Fizi mu Ntara ya Kivu y’Amajyepfo, Repubulika Iharanira Demokarasi ya Kongo, umutwe witwaje intwaro wa Maï Maï Yakutumba ukomeje kwibasira abaturage b’Abanyamurenge, ukabangamira ituze ryabo binyuze mu gushyiraho bariyeri no kubabuza gutambuka mu buryo bworoshye.

Uyu mutwe washyizeho imipaka ahantu hatandukanye, aho abagenzi bacibwa amafaranga kugirango bemererwe gukomeza urugendo.

Ibintu byarushijeho kuba bibi nyuma y’aho Depite Justin Bitakwira atorewe guhagararira aka gace. Abaturage bavuga ko Bitakwira ari we uri gushishikariza uyu mutwe kuva mu bihuru bakaza kwibasira Abanyamurenge, akomeje kubiba inzangano zishingiye ku moko, ibintu byasaga n’aho bigeze ku rwego rwa Jenoside yeruye.

Tumwe mu duce Mai Mai Yakutumba yashyizemo bariyeri birimo Makabola, Munene, Swima, Milimba, Kadegu, Mukera, Nakatete, Ilambo, Chabula na Kanande. Abaturage banyura muri utwo duce basabwa kwishyura amafaranga y’u Rwanda 1.000, abandi bagafatirwa ibihano bikarishye igihe babuze ayo mafaranga.

Abahagarariye umuryango w’Abanyamurenge bavuga ko ibyo Bitakwira arimo bikorwa bigamije gushyigikira Jenoside, ahanini yifashishije amagambo ashaririye ashingiye ku moko.

Bitakwira kandi azwiho kuba somambike wa Perezida Félix Tshisekedi, akaba ashinjwa gukwirakwiza imvugo z’urwango zigamije kurimbura Abatutsi muri Repubulika Iharanira Demokarasi ya Kongo.

Ibikorwa nk’ibi birushaho guhungabanya umutekano muri aka gace ka Kivu y’Amajyepfo, kandi bigaragaza ikibazo gikomeye cy’ubusumbane n’urwango rishingiye ku moko muri iki gihugu. Umuryango mpuzamahanga ukomeje gukurikirana neza ibi bibazo ngo harebwe icyakorwa mu gukumira no gukemura aya makimbirane.