Congo yashyizeho Miliyoni 5$ ku muntu uzafata Nangaa, Bisimwa na Makenga

Leta ya Congo yashyizeho igihembo cya miliyoni 5 z’amadolari ya America ku bantu bayifasha gufata abayobozi batatu b’ihuriro Alliance Fleuve Congo rifatanya na M23.

Congo ivuga ko abo bayobozi baciriwe imanza kandi bahabwa igihano (cy’urupfu).

Itangazo ryasohowe na Minisitiri w’Ubutabera ku wa Gatanu rivuga ko hagenwe igihembo cya miliyoni 5 z’amadolari ku muntu wafasha mu guta muri yombi Corneille Nangaa, Bertrand Bisumwa na Gen Sultani Makenga.

Muri iryo tangazo Leta ya Congo inavuga ko yashyizeho igihembo cya miliyoni 4 z’amadolari ku muntu uzatuma abitwa Perrot Luwara na Irenge Baelenge ivuga ko bakorana n’abayobozi ba AFC/M23 na bo bafatwa.

Urukiko rwa Gisirikare rw’i Kinshasa ruherutse gusohora inyandiko mpuzamahanga zo gufata Corneille Nangaa Yobeluo, Umuyobozi wa Alliance du Fleuve Congo (AFC).

Izo nyandiko zo guta muri yombi Nangaa zasohotse tariki 05 Gashyantare, 2025.

Muri Kanama 2024 Urukiko Rukuru rwa Gisirikare i Kinsahsa rwaburanishije Nangaa adahari rumukatira igihano cyo Gupfa rumaze kumuhamya ibyaha by’intambara, ibyaha byibasiye inyoko muntu, no kwigumura kuri Leta.

Corneille Nangaa wabaye Perezida wa Komisiyo y’Amatora muri Congo avuga ko ubutegetsi bwa Perezida Felix Tshisekedi butemewe kuko ngo “atatowe n’abaturage”.

Ihuriro ayoboye M23/ACF ryigaruriye ibice byinshi muri Kivu ya Ruguru na Kivu y’Epfo, harimo imijyi uwa Goma na Bukavu.