Charles Onana wakunze kurengera Leta ya Habyarimana agiye kuburanishwa

Kuva mu kwezi gutaha k’Ukwakira 2024, i Paris mu Bufaransa, hateganyijwe gutangira kuburanishwa urubanza rw’umunya-Caméroun Charles Onana, ushinjwa guhakana no gupfobya Jenoside yakorewe Abatutsi mu 1994. Urubanza rwe ruzatangira ku wa 7 Ukwakira rukazamara iminsi ine.

Iki kirego cyatanzwe n’Umuryango w’Abanyarwanda baba mu Bufaransa (CRF) mu Ugushyingo 2019, nyuma y’uko Charles Onana ashinjwa kuvuga amagambo ahakana Jenoside mu kiganiro cyatambutse kuri televiziyo y’Abafaransa, LCI, mu mwaka wa 2019. Muri icyo kiganiro, Onana yabwiye umunyamakuru Vincent Hervouët ko nta Jenoside yabayeho mu Rwanda mu 1994, ndetse anavuga ko nta yindi Jenoside yabaye kuva mu 1900.

Me Gisagara Richard, wunganira CRF, yatangaje ko ibitabo Charles Onana yanditse n’ubushakashatsi bwe bigamije guhakana Jenoside yakorewe Abatutsi, kandi ko ashinja Leta y’u Rwanda uruhare muri Jenoside yise ko yakorewe abanye-Congo. Ibi byatumye Abanyarwanda batuye mu Bufaransa bafatanya n’imiryango itandukanye kugira ngo bajyane Onana mu butabera.

Urubanza rwa Charles Onana rufite agaciro gakomeye nk’uko Me Gisagara abivuga, kuko niba iki cyaha cyo guhakana Jenoside kitamuhamye, byaba bitesha agaciro itegeko rihana abapfobya Jenoside. Niba ahamwa n’icyaha, Onana ashobora guhanishwa igifungo cy’umwaka umwe ndetse n’ihazabu y’ama-Euro 45,000.

Ivomo:Bwiza