Chairman wa APR FC yavuze ko abavuga ko yo na Rayon Sports ari abakeba ngo nukugereranya ibitagereranywa

Ibi Col Karasira yabitangaje nyuma y’umukino APR WFC yatsinzemo Forever WFC ibitego 3-0 ku Cyumweru, ikegukana Igikombe cya Shampiyona y’Icyiciro cya Kabiri mu Bagore.

Ubwo yari abajijwe n’abanyamakuru niba APR WFC ayobora, yiteguye guhangana na mukeba Rayon Sports WFC yatwaye Igikombe cya Shampiyona y’Icyiciro cya Mbere ku wa Gatandatu, Col Richard Karasira yavuze ko abageraranya amakipe yombi [muri rusange] nk’amakeba, bibeshya cyane kuko ntaho ahuriye.

Ati “Kare nigeze gutekereza ubukeba mujya muvuga, nkibaza mbere na mbere aho buturuka. Sinzi icyo binavuga. Bamwe bari ku bikombe 20, abandi bari ku bikombe bitandatu, mukunda kugereranya ibintu bitagereranywa, ntimukagereranye ibintu bitagereranywa.”

Abanyamakuru bamusobanuriye ko baba bashaka kumvikanisha ikipe ihangana cyane na APR FC, Col Karasira avuga ko niba ari uko bimeze, aho bafite ukuri.

Ati “Ariko niba ari ikipe duhanganye, ni byo. Kuko ni ikipe twubaha ubundi, ifite abafana, ifite abantu bayikunda.”

Mu Bagabo, Ikipe ya APR FC irasatira gutwara Igikombe cya Shampiyona ku nshuro ya 23 mu myaka 31 imaze ishinzwe, ndetse bizaba ari inshuro ya gatanu yikurikiranya kuva mu 2020. Ni mu gihe Rayon Sports imaze kuyegukana inshuro icyenda.