CG (Rtd) Gasana Emmanuel yahawe imbabazi na Perezida Paul Kagame

CG (Rtd) Gasana Emmanuel, wahoze ari Guverineri w’Intara y’Iburasirazuba, yahawe imbabazi na Perezida Paul Kagame nyuma yo guhamwa n’ibyaha byo gukoresha nabi ububasha yari afite mu nyungu ze bwite.

Urukiko Rwisumbuye rwa Nyagatare rwari rwamukatiye gufungwa imyaka itatu n’amezi atandatu, ndetse rukamuca ihazabu ya miliyoni 36 Frw.

Nubwo yahawe imbabazi, Gasana asabwa kubahiriza amabwiriza arimo kwiyereka umushinjacyaha wo ku rwego rw’ibanze inshuro imwe buri kwezi, kwimenyesha inzego z’aho atuye, no gusaba uruhushya igihe akeneye kujya mu mahanga.

Iyo atubahirije ibyo bisabwa, imbabazi zishobora kwamburwa, bigatuma yongera gufungwa igihe cy’igifungo yari asigaje.

Iri teka rya Perezida rigaragaza ko Gasana ari umwe mu bantu bagizweho impuhwe, nk’uko bigaragara mu Iteka rya Perezida ryasohotse mu Igazeti ya Leta ku wa 18 Ukwakira 2024, rikaba risaba ko abahawe imbabazi bubahiriza ayo mabwiriza kugeza igihe cy’igifungo bari basigaje kirangiye.