Ba Jenerali 2 bishwe n’impanuka

Abasirikare babiri bakuru b’Igisirikare cya Uganda (UPDF), Brig Gen (Rtd) Frank Katende Kyambadde na Brig Gen Fred Twinamasiko, bapfuye bazize impanuka y’imodoka yabereye ahitwa Lukaya ku muhanda uhuza imijyi ya Kampala na Masaka.

Iyi mpanuka y’imodoka yabaye ku wa Gatanu, tariki ya 13 Nzeri 2024, ikaba yahitanye aba basirikare bakuru barimo Brig Gen Kyambadde, wari mu kiruhuko cy’izabukuru, ndetse na Brig Gen Twinamasiko, wari akiri mu ngabo, akaba yari Umuyobozi ushinzwe amahugurwa mu ngabo zirwanira ku butaka za Uganda.

Umuvugizi wungirije w’Igisirikare cya Uganda, Col Deo Akiiki, yemeje amakuru y’urupfu rw’aba ba-Jenerali bombi, avuga ko iyi mpanuka yabaye ku modoka ifite Plaque H4DF2588.

Col Akiiki yagaragaje ko urupfu rw’aba basirikare rukurikiye urwa Hon Sarah Mateke wahoze ari Umunyamabanga wa Leta ushinzwe ingabo, kandi ari igihombo gikomeye kuri Uganda mu gihe gito cyane.

Yanditse ubutumwa kuri X agira ati: “Ni gute twakwitega kumva iki gihombo mu gihe gito nk’iki ngiki? Umunyamabanga wa Leta, Hon Sarah Mateke, Brig Gen (rtd) Kyambadde ndetse na Brig Gen Fred Twinamasiko bose baragiye. Imana ikomeze imiryango yabo. Ni ibihe bigoye.”

Brig Gen (Rtd) Frank Katende Kyambadde yari mu kiruhuko cy’izabukuru, nyuma yo kumara igihe kinini mu kazi, ndetse muri Nyakanga 2023 ni bwo yashyizwe mu kiruhuko kimwe n’abandi bakuru barimo Gen Kale Kayihura wahoze ayobora Polisi ya Uganda. Brig Gen Fred Twinamasiko, we yari agikora, akora inshingano zo kuyobora amahugurwa mu ngabo zirwanira ku butaka za Uganda.

Iyi mpanuka y’abayobozi bakuru ikomeje kugora igihugu cya Uganda, cyakomeje kubura bamwe mu banyacyubahiro mu ngabo no mu nzego z’ubuyobozi.