APR FC yasinyishije rutahizamu

kipe ya APR FC yasinyishije rutahizamu w’Ikipe y’Igihugu ya Burkina Faso, Djibril Ouattara, wavugwaga muri Ittihad Tanger yo muri Maroc, ku masezerano y’imyaka ibiri.

Djibril Ouattara waherukaga gutandukana na JS Kabylie iyoboye Shampiyona ya Algérie, yifuzwaga cyane na Ittihad Tanger ndetse amakuru menshi yavugaga ko iyi kipe yo muri Maroc yamaze kumwegukana.

Uyu mukinnyi yitezweho kuba igisubizo mu busatirizi bwa APR FC, ariko azahanganira umwanya na Victor Mbaoma, Mamadou Sy na Tuyisenge Arsène usigaye ukinishwa kuri uwo mwanya.

Yabaye uwa gatatu Ikipe y’Ingabo z’Igihugu iguze muri uku kwezi nyuma y’Abanya-Uganda Hakim Kiwanuka na Denis Omedi bakina ku mpande basatira izamu.

Cheick Djibril Ouattara w’imyaka 25 y’amavuko akinira ikipe y’igihugu ya Brukina Faso kuva tariki 24 Kanama 2018, aho amaze gukina imikino 14 yatsinzemo ibitego bibiri.

Uyu musore ariko mbere yo kugera mu ikipe y’igihugu nkuru, yananyuze mu batarengeje imyaka 20 aho mu 2019 mu mikino ya Afurika, yanafashije igihugu cye gutwara umudali wa zahabu ari we utsinze ibitego byinshi.

Cheick Djibril Ouattara yagiranye ibihe byiza na RS Berkane, kuko 2019-2020 batwaranye igikombe cya CAF Confederation Cup mu gihe batsindiwe ku mukino wa nyuma wacyo kabiri, 2018-2019 na 2023-2024, mu gihe banatwara ibikombe bibiri bya Throne Cup imbere muri Maroc 2020-2021 na 2021-2022.

Nyuma yo kuva muri RS Berkane, mu mpeshyi ya 2024 yasinyiye JS Kabylie yo muri Algeria amasezerano y’imyaka itatu, ariko yirukanwa tariki ya 6 Mutarama 2025 akinnyemo igice cy’umwaka, aho yari amaze gukina imikino umunani ya shampiyona atsinze igitego kimwe, mu gihe muri rusange kuva 2019-2020 akina muri RS Berkane kugeza ubu asezererwa muri Algeria, yari akinnye imikino 86 ya za shampiyona, habariwemo n’aho yagiye atizwa akiri muri Maroc mu bihe bitandukanye atsindamo ibitego 13 byonyine mu myaka itanu, nk’uko bigarazwa n’urubuga

APR FC yasinyishije uyu rutahizamu ku masezerano y’imyaka ibiri.