APR FC yahakanye kutishyura abakinnyi

Mu ijoro ryo ku wa Kane, tariki ya 13 Werurwe 2025, ubuyobozi bwa APR FC bwashyize ahagaragara itangazo risobanura ku makuru amaze iminsi avugwa ko yaba imaze amezi abiri idahemba abakinnyi bayo.

Iyi kipe yemeje ko yubahiriza amasezerano ifitanye n’abakinnyi ndetse n’abakozi bose.

Mu itangazo ryasohowe n’iyi kipe y’Ingabo z’Igihugu, bagaragaje ko amakuru avuga ko batahemba abakinnyi n’abandi bakozi ari ibihuha, bagasaba abafana kudaha agaciro ayo makuru.

“Itangazo rigira riti: ‘Ubuyobozi bwa APR FC buranyomoza ibihuha birimo gukwirakwizwa mu itangazamakuru bivuga ko itarahemba abakinnyi n’abandi bakozi bayo. APR FC ni ikipe yubahiriza amasezerano yose kandi ihembera ku gihe.’”

Iyi kipe yanasabye abakunzi bayo ndetse n’Abanyarwanda muri rusange kudaha agaciro ibyo binyoma bifite intego yo guharabika isura y’ikipe.

Uretse kwikoma ibihuha bijyanye n’imishahara, APR FC yananyomoje amakuru avuga ko yaba yarasabye abafana bayo gukusanya inkunga yo kuyifasha kwitegura umukino uzayihuza na Gasogi United.

Ibi byatangiye guhwihwiswa mbere y’umukino ukomeye wa APR FC na Rayon Sports, warangiye amakipe yombi anganyije ubusa ku busa. Iyi kipe ivuga ko ari ibihuha bigamije kuyobya abafana no kuyiteranya n’abakunzi bayo.

Kugeza ubu, APR FC iri ku mwanya wa kabiri muri shampiyona y’u Rwanda n’amanota 41, aho irushwa amanota abiri na Gikundiro iri ku mwanya wa mbere. Kuri uyu wa Gatanu tariki ya 14 Werurwe 2025, iyi kipe iritegura gucakirana na Gasogi United FC mu mukino utegerejwe n’abakunzi b’umupira w’amaguru mu Rwanda.

Bikomeje kugaragara ko amakuru atemewe n’amakuru y’ibihuha byibasiye iyi kipe, ariko ubuyobozi bwa APR FC bwemeza ko bukomeje kwita ku nyungu z’ikipe n’abakinnyi bayo.