AFC/M23 yavuye mu Mujyi wa Walikale

Ihuriro AFC/M23 rirwanya ubutegetsi bwa Repubulika Iharanira Demokarasi ya Congo, ryatangaje ko ryavuye mu Mujyi wa Walikale no mu bice biwukikije, mu Ntara ya Kivu y’Amajyaruguru.

Abarwanyi ba AFC/M23 bafashe uyu mujyi tariki ya 19 Werurwe 2025 n’Ikibuga cy’Indege gito cya Kigoma nyuma yo gufata ibindi bice biwukikije birimo Ngora, Kisima na Mubanda.

Umuvugizi wa AFC/M23, Lawrence Kanyuka, kuri uyu wa 22 Werurwe yatangaje ko kugira ngo ibiganiro bya politiki bibe mu mwuka mwiza, abarwanyi babo bafashe icyemezo cyo kuva muri uyu mujyi no mu nkengero zawo.

Ati “Ihuriro AFC/M23 ryafashe icyemezo cyo gukura ingabo mu Mujyi wa Walikale no mu bice biyikikije.”

Kanyuka yasabye abaturage bo muri uyu mujyi n’abayobozi babo gufata ingamba zo kwirindira umutekano no kurinda imitungo yabo, nyuma y’aho abarwanyi babo bawuvuyemo.

AFC/M23 yateguje ko ihuriro ry’ingabo za Leta ya RDC niryongera kugaba ibitero ku basivili no ku birindiro byayo, irisubira kuri iki cyemezo, igasubirana uyu mujyi.