Abanyamerika batandatu bafunzwe bazira gufotora ishuri rya Perezida w’Inteko

Abakerarugendo b’Abanyamerika batandatu n’umushoferi wabo batawe muri yombi na Polisi ya Uganda ubwo bafatwaga bari gufotora ikigo cy’amashuri cya Anita Among, Perezida w’Inteko Ishinga Amategeko. Aba bakerarugendo bari mu bagize umuryango utegamiye kuri Leta ufasha bimwe mu bigo by’amashuri muri Uganda ndetse n’abanyeshuri bo mu mashuri abanza n’ayisumbuye.

Ubwo bari mu rugendo berekeza muri Pariki y’Igihugu ya Murchison Falls, umuyobozi wabo witwa Richard Dick Burk yasabye umushoferi gutwara gake kugira ngo yereke bagenzi be ikigo cy’amashuri umuryango wabo ufasha. Uwari ushinzwe umutekano kuri iki kigo yabasanganiye abakanga, ababuza gufotora. Nyuma yo gusobanura ko bari kureba uko ikigo batera inkunga kimeze, yahise abahamagarira abapolisi.

Aba bapolisi bajyanye aba bakerarugendo kuri sitasiyo ya Ngora, aho bamaze amasaha abiri bahatwa ibibazo. Burk yasobanuye ko aziranye na Among kandi ko hari abana afasha biga muri iri shuri. Nyuma y’igitutu cyinshi cy’abahamagaraga ku biro bya Polisi, aba bakerarugendo bararekuwe, ariko Polisi yabanje gufotora pasiporo zabo n’indangamuntu.

Chris Obore, Umuyobozi w’itumanaho n’ibibazo rusange mu Nteko Ishinga Amategeko, yavuze ko ikibazo atari ukubafotora ikigo, ahubwo imyitwarire yabo hafi y’iki kigo ari yo yatumye batabwa muri yombi.