Abagabo Bane Bo mu Murenge wa Mbuye Bakurikiranyweho Kwicira Mugenzi Wabo mu Muhuro w’Ubukwe

Abagabo bane bo mu Murenge wa Mbuye mu Karere ka Ruhango barakekwa kwicira mugenzi wabo witwa Niyigaba Jacques, wari ufite imyaka 24 y’amavuko, mu muhuro w’ubukwe. Niyigaba Jacques yari atuye mu Mudugudu wa Kigabiro mu Murenge wa Mbuye muri aka karere.

Abaturage babonye uko yishwe bavuga ko Niyigaba yajyanye mu muhuro na bagenzi be bane, aho bari bitabiriye ubukwe bw’umwana w’umuturanyi. Nyuma yo gusohoka mu muhuro, batangiye kurwana, bikaza kurangira Niyigaba akubiswe bikomeye, umwe muri abo bagabo amukandagira mu nda kugeza apfuye.

Umwe mu baturage yagize ati, “Nabonye uwitwa Majyambere ari we umusigarana, abandi bahise bahunga.”

Aya makuru yemejwe n’Umunyamabanga Nshingwabikorwa w’Umurenge wa Mbuye, Muhire Floribert, wavuze ko amakuru y’urupfu rwa Niyigaba Jacques bayamenye, gusa ngo abakekwaho iki cyaha batamwiciye mu muhuro, ahubwo uru rugomo rwabereye hanze bawuvuyemo. Ati, “Uwo muntu yapfuye koko, birakekwa ko ari urugomo yakorewe na bagenzi be bari kumwe bavuye mu muhuro.”

Gitifu Muhire yemeje ko abashinjwa iki cyaha bafashwe bakaba bajyanywe kuri stasiyo ya RIB mu Murenge wa Byimana kugira ngo hakorwe iperereza. Umurambo wa Niyigaba Jacques wajyanywe mu Bitaro bya Kinazi kugira ngo usuzumwe.

Iri sanganya ryateye agahinda mu baturage b’Umurenge wa Mbuye, aho bakomeje gusaba ko ubutabera bukora akazi kabwo neza kugira ngo ababigizemo uruhare babiryozwe.