Muhanga: Umugabo W’imyaka 25 Yiyahuje kiyoda ariko ajyanwa kwa muganga atarapfa

Mu ijoro ryacyeye ryakurikiye tariki ya 6 Nzeri 2024, Jyamubandi Baptiste w’imyaka 25, utuye mu Mudugudu wa Nyarucyamu ya Gatatu, Akagali ka Gahogo, Umurenge wa Nyamabuye mu Karere ka Muhanga, yiyahuje umuti wa kiyoda ariko aratabarwa ajyanwa mu bitaro atarapfa.

Nk’uko Imvaho Nshya ibitangaza, uyu mugabo yiyahuye akoresheje umuti wa kiyoda, ariko amakuru yageze ku nzego zibanze akaba yarakoze ibishoboka byose kugira ngo abashe kumutabara, bamujyana mu bitaro bya Kabgayi.

Umunyamabanga Nshingwabikorwa w’Umurenge wa Nyamabuye, Nshimiyimana Jean Claude, yabwiye Imvaho Nshya ko amakuru y’iki gikorwa ari impamo kandi ko Jyamubandi Baptiste yagejejwe kwa muganga akiri muzima, nubwo icyamuteye kwiyahura kikiri gukorwa iperereza.

Yagize ati: “Ni byo koko, Jyamubandi Baptiste w’imyaka 25 yiyahuye akoresheje umuti wa kiyoda tariki ya 6 Nzeri saa mbiri z’umugoroba, ariko twabashije kumutabara tumugeza kwa muganga akiri muzima. Turacyakora iperereza kugira ngo tumenye icyamuteje kwiyahura.”

Nshimiyimana asaba abaturage gushakira ibisubizo mu buryo bwiza, bagashaka ubufasha bw’inzego zibanze mu gihe bahuye n’ibibazo, aho kwiyahura atari cyo gisubizo.

Yagize ati: “Nubwo tutaramenya icyamuteye kwiyahura, turasaba Abanyarwanda gukemura ibibazo mu buryo bwiza no kwegera ubuyobozi mu gihe babikeneye, kuko kwiyahura nta gisubizo gifite.”

Ashimira kandi abaturanyi ba Jyamubandi Baptiste ku bwo gutanga amakuru ku gihe, avuga ko iyo bataba bo, inzego zibanze zari gusanga yaramaze gushiramo umwuka.

Yavuze ati: “Ndashimira abaturanyi b’uyu mugabo batangiye amakuru ku gihe. Ibi byabafashije cyane kugira ngo inzego z’ibanze zishobore kumufasha mbere y’uko agira ikibazo gikomeye.”

Umunyamabanga Nshingwabikorwa avuga ko Jyamubandi Baptiste ari kwitabwaho n’abaganga mu bitaro bya Kabgayi, ariko icyamuteye kwiyahura ntikiramenyekana. Abavandimwe be ntibari bahari ubwo yabikozaga, usibye amakuru y’uko yavuganye na se umubyara amubaza nimero z’irangamuntu ngo ajye kwishyura ubwisungane mu kwivuza.