Atletico Madrid yasinye amasezerano yo kwamamaza Visit Rwanda

Ikipe ya Atlético de Madrid yabaye iya mbere yo muri Espagne yinjira mu bufatanye n’ubukangurambaga bwa Visit Rwanda, isanga andi makipe akomeye ku mugabane w’u Burayi barimo Arsenal, Bayern Munich, na Paris Saint-Germain (PSG).

Ku wa kabiri, Atlético de Madrid yatangaje ko yasinye amasezerano y’ubufatanye na Visit Rwanda, agashyira u Rwanda ku rutonde rw’ibihugu bikoresha siporo mu kwamamaza ubukerarugendo n’isura yabyo ku rwego mpuzamahanga.

Atlético de Madrid ni imwe mu makipe akomeye mu cyiciro cya mbere cya shampiyona ya Espagne (La Liga), ikaba ifite amateka akomeye muri ruhago y’u Burayi, irimo gutwara igikombe cya shampiyona inshuro 11 ndetse n’imikino ya UEFA Europa League.

Kubera imbaraga Atlético ifite mu banyamuryango, abafana no mu biganiro bikomeye bya siporo, iri kwamamaza rizafasha u Rwanda kugera ku bantu benshi baturutse imihanda yose y’isi.

Ubufatanye bwa Visit Rwanda na Atlético de Madrid buje bwiyongera ku bwari busanzwe n’amakipe akomeye arimo Arsenal FC yo mu Bwongereza,Bayern Munich yo mu Budage na Paris Saint-Germain (PSG) yo mu Bufaransa.

Ibi bikorwa bigamije gushishikariza ba mukerarugendo gusura u Rwanda, by’umwihariko binyuze mu kwamamaza imico, pariki z’igihugu, ubukerarugendo bushingiye ku muco n’urusobe rw’ibinyabuzima.

Nk’uko Minisiteri y’Ubukerarugendo n’Iterambere ry’Amasoko (RDB) yakomeje kubigaragaza, ibikorwa nk’ibi bifasha mu guteza imbere ubukerarugendo bw’u Rwanda no kurushaho kurumenyekanisha mu ruhando mpuzamahanga.

Amasezerano nk’aya kandi agaragaza ishoramari ry’ubwenge rishingiye ku kumenyekanisha igihugu mu buryo burambye binyuze muri siporo.