Menya abayobozi 12 mu Rwanda bemerewe kurindwa n’abajepe

Mu Rwanda, abasirikare ba Republican Guard, bazwi nk’abajepe, ni itsinda ridasanzwe mu Ngabo z’u Rwanda (RDF) rishinzwe kurinda abayobozi bakuru b’igihugu ndetse n’abanyacyubahiro bagenwe n’amategeko.

Nubwo benshi babafata nk’abasirikare bashinzwe umutekano wa Perezida wa Repubulika gusa, inshingano zabo zirimo no kurinda abandi bayobozi bakomeye.

Ibi bikorwa byabo bishimangirwa n’Iteka rya Perezida No 33/01 ryo ku wa 03 Nzeri 2012, cyane cyane mu ngingo yaryo ya 42, isobanura imirimo yabo.

Abayobozi 12 Bemerewe Kurindwa n’Abajepe

Dukurikije ibisobanuro bitangwa n’iri teka, aba ni bamwe mu bayobozi bemerewe kurindwa n’abasirikare ba Republican Guard:

1. Perezida wa Repubulika n’umuryango we wa hafi.
2. Perezida wa Sena.
3. Perezida w’Umutwe w’Abadepite.
4. Perezida w’Urukiko Rukuru.
5. Minisitiri w’Intebe.
6. Abakuru b’Ibihugu n’aba za Guverinoma bo hanze bagendereye u Rwanda.
7. Perezida watowe utaratangira imirimo, hamwe n’umuryango we wa hafi.
8. Perezida ucyuye igihe n’umuryango we wa hafi.
9. Perezida wa Sena ucyuye igihe, mu gihe cy’umwaka umwe.
10. Perezida w’Umutwe w’Abadepite ucyuye igihe, mu gihe cy’umwaka umwe.
11. Perezida w’Urukiko Rukuru ucyuye igihe, mu gihe cy’umwaka umwe.
12. Minisitiri w’Intebe ucyuye igihe, mu gihe cy’umwaka umwe.

Uretse aba bayobozi, Iteka rya Perezida rinatanga uburenganzira ku Mugaba Mukuru w’Ingabo z’u Rwanda bwo kongerera abandi bantu cyangwa ahantu kurindwa na Republican Guard, bitewe n’impamvu z’umutekano cyangwa izindi mpamvu zifatika.

Iki kigo cyihariye mu ngabo z’u Rwanda gikora imirimo ikomeye mu gucunga umutekano w’abayobozi bakuru no kugenzura ahantu hakomeye haba haragenewe kurindwa.