Gen Makenga Yakomoje kuri Perezida Tshisekedi Wemeye Imishyikirano

Jenerali Sultan Makenga, umuyobozi w’Ingabo za M23, yatangaje ko Perezida wa Repubulika Iharanira Demokarasi ya Congo (RDC), Félix Tshisekedi, wemeye kugirana ibiganiro na M23, ari umuntu udakunda igihugu ahubwo ari igisambo.

Ibi yabigarutseho mu kiganiro yagiranye na Alain Destexhe, wahoze ari senateri mu Bubiligi akaba n’Umunyamabanga Mukuru w’Umuryango w’Abaganga Batagira Umupaka, wari umaze iminsi asura ibice bigenzurwa na M23.

Ni nyuma y’uko Guverinoma ya Angola yemeje ko ku wa 18 Werurwe 2025, abarwanyi ba M23 bazagirana ibiganiro bitaziguye n’uruhande rwa leta ya RDC, ibiganiro biteganyijwe kubera i Luanda.

Gen Makenga: “Turiteguye kuganira, ariko ntituramenya aho RDC ihagaze”

Gen. Makenga yavuze ko nubwo biteguye ibiganiro bitaziguye na Kinshasa, kugeza ubu bumvise gusa uruhande rwa Angola nk’umuhuza, ariko ntibaramenya aho RDC ihagaze.

Ati: “Ni byo, turashaka kuganira, ariko kugeza ubu twamenye gusa icyerekezo cy’Angola, ariko nta kintu na kimwe twumvise kivuye i Kinshasa.”

Yongeyeho ko urugamba bamazemo igihe bahanganyemo na FARDC atari gahunda bafite yo gukomeza kugeza i Kinshasa nyuma yo gufata umujyi wa Goma na Bukavu.

Ati: “Oya, keretse bibaye ngombwa kuko duterwa. Turwanira kubaho kwacu. Abantu bagomba gusobanukirwa ko twafashe intwaro kugira ngo twirwaneho kuko twari kurimburwa. Ntitwakwemera ko badutsemba.”

M23 Ishimangira ko Irwanira Uburenganzira Bw’Abaturage

Gen. Makenga yavuze ko intego yabo ari amahoro, kuko gufata intwaro byari uburyo bwo kwirwanaho mu gihe ubutegetsi bwa Kinshasa burimbura abaturage.

Yavuze ko abasirikare ba M23 barwana kubera urukundo rw’igihugu, atari ku nyungu z’ubutunzi. Ati: “Abasirikare bacu ntibahembwa. Barwana kuko babyemera kandi bakunda igihugu cyabo, bafite ubutwari buhebuje.”

Yagarutse ku kibazo cy’umujyi wa Goma, avuga ko batari kwemera ko ukomeza kwifashishwa na FARDC mu kurasa ku birindiro bya M23 no ku baturage b’abasivile bo mu bice bigenzurwa na M23.

Yasobanuye kandi ko gufata Bukavu byatewe n’uko FARDC n’Ingabo z’u Burundi bakoreshaga ikibuga cy’indege cya Kavumu mu bikorwa byo gutera ibisasu biremereye ku baturage no ku barwanyi ba M23.

Gen. Makenga yanavuze ko FARDC yakomeje ibikorwa byo gutera amabombe ku baturage b’inzirakarengane bakoresheje indege zitagira abapilote zihaguruka i Kisangani.

Gen. Makenga Yise Tshisekedi Umuntu Udakunda Igihugu

Adaciye ku ruhande, Gen. Makenga yavuze ko Perezida Tshisekedi ari umuntu udakunda igihugu, ahubwo ari umujura.

Ibi yabivuze ashingiye ku kuba hari ibice byinshi bikikije aho M23 igenzura bikomeje kugira umutekano muke, ibintu avuga ko biterwa na Tshisekedi wifuza ko abahatuye batagira amahoro.

Ati: “Ibyo bituma duhora twirwanaho, ibyo bituma bene wacu bamaze imyaka n’imyaka mu buhunzi, birirwa bikoreye imisambi ku mutwe batazi aho bari burare tugomba kuyivanaho kandi aho ni mu buryo bwo kwirwanaho.”

Uruhande rwa Tshisekedi rwemeje ibiganiro mu rwego rw’ubuhuza

Tina Salama, umuvugizi wa Perezida Tshisekedi, yavuze ko bemeye ibiganiro mu rwego rwo gukurikiza ibikubiye mu mwanzuro wafatiwe mu biganiro by’Umuhuza wabanje byabereye i Nairobi muri Kenya.

Perezida Tshisekedi yari yaratangaje ko nta na rimwe azigera aganira na M23, gusa amahanga akomeje kumusaba kugana inzira y’ibiganiro kugira ngo ikibazo cy’umutekano muke mu Burasirazuba bwa RDC kibonerwe umuti urambye.