RDC: Abakozi ba LONI, EU,Ambassade y’u bufaransa na Amerika mu mazi abira

Umukuru w’ingabo z’Umuryango w’Abibumbye muri Repubulika ya demokarasi ya Kongo aravuga ko abakozi ba ONU n’imodoka barimo baguye mu gico bamishwaho urusasu mu murwa mukuru Kinshasa, ambasade y’Ababiligi, abafaransa, Amerika ndetse n’umuryango w’Ubumwe bw’I Bulayi nazo ziri mu bibazo

Ni mu gihe hakomeje intambara mu burasirazuba bw’icyo gihugu ituma umwuka wo kwamagana ingabo LONI wiyongera muri rubanda.

Ibitero by’abantu bagendera ku mapikipiki byari bigandagaje mu karere ka Gombe i Kinshasa mu murwa mukuru w’icyo gihugu aho ibiro by’ingabo z’Umuryango w’Abibumbye (MONUSCO) biherereye.

Umunyamakuru w’ibiro ntaramakuru by’Abongereza, Reuters, wabibonye, aravuga ko aho bari bakoraniye bahatwikiye n’amapine y’imodoka.

Umukuru wa MONUSCO muri Repubulika ya demokarasi ya Kongo, Bintu Keita, abinyujije ku rubuga rwa interineti yatangaje ko zimwe mu modoka z’Umuryango w’Abibumbye zatwitswe avuga ko yamaganye icyo gikorwa akomeje.

Ambasade ya Cote d’Ivoire muri Kongo na yo yatangaje ko hari imodoka zayo zibwe i Kinshasa mu gihe hakomeje ubujura n’ibitero bigabwa kuri za ambasade z’ibihugu binyuranye by’amahanga nta kurobanura.

Inzego za polisi n’iz’ubutegetsi ntizashubije kuri iki kibazo.

Ku cyumweru amabendera y’ibihugu by’u Bubiligi, u Bufaransa Leta zunze ubumwe za Amerika ndetse n’umuryango w’ubumwe bw’I bulayi ( EU) amabendera yabyo nayo yamanuwe n’insoresore zikorera muri ako gace

Hagati aho Inyeshyamba za M23 zikomeje gusatira umujyi wa Goma uri mu burasirazuba bw’igihugu mu ntara ya Kivu ya ruguru.

Iyi ntambnara hagati y’inyeshyamba ingabo za leta n’abazishyigikiye, yakajije umurego muri iyi minsi ituma umutekano wari usanzwe ugerwa ku mashyi muri aka karere urushaho kuzamba.

Umuryango w’Abibibumbye uvuga ko iyi ntambara yakuye mu byabo abantu barenga 135 000. Abenshi muri bo bahungira mu duce twegereye Goma aho bakeka ko babona umutekano.