Perezida Biden yavuze ko Amerika izahora kw’isonga imbere y’Ubushinwa

Muri Leta zunze ubumwe z’Amerika, Perezida Joe Biden uyu munsi yavuze disikuru yo gusezera ku bakozi ba minisiteri y’ububanyi n’amahanga. Yavuze ko Amerika izahora kw’isonga kw’isi. “Ubushinwa ntibuzigera buyitambuka.”

Perezida Biden yavuze ko Amerika yari ikomeye ku rwego rw’isi kuruta uko byari bimeze mu myaka mirongo. Hari mu ijambo rye kuri politiki y’ububanyi n’amahanga hasigaye icyumweru kimwe rukumbi ngo perezida watowe Donald Trump asubire muri Perezidansi y’Amerika, Maison Blanche.

Perezida w’Amerika ucyuye igihe, yerekeje ijambo rye k’Uburusiya, Ubushinwa na Irani, anasaba ibihugu byo mu burengerazuba bw’isi, gukomeza gushyigikira Ukraine.

Gusa, uwo Perezida Biden yari agambiriye, ariko atamuvuze mw’izina, ni Trump ubwo yavugaga ko yongeye kubaka ubumwe mpuzamahanga mu myaka ine ishize, nyuma ya manda ya mbere y’umurepuburikani bagiye gusimburana ku ntebe, avuga ko yaranzwe n’akajagari.

Perezida Biden yagize ati: “Amerika yatsinze amarushanwa ku isi yose ugereranije n’imyaka ine yabanje” Amerika irakomeye. Urugaga rwacu rurakomeye, abanzi bacu ndetse n’abo duhigana, barushijeho kugira intege nke”.

Perezida Joe Biden yavuze ko perezida ugiye kujya ku buyobozi, mbere yari yagaragaje ko yishimiye perezida w’Uburusiya Vladimir Putin. Yagize ati: “Igihe Putin yateraga Ukraine, yatekereje ko azatsinda Kyiv mu minsi mike. Ukuri ni uko, kuva intambara yatangira, ninjye jyenyine wahagaze i Kyiv, ntabwo ari we.”

Biden yabaye perezida wa mbere w’Amerika wasuye akarere kaberamo intambara katagenzurwa n’ingabo z’Amerika, ubwo yagiriraga uruzinduko mw’ibanga rikomeye mu murwa mukuru wa Ukraine mu 2023.

Mw’ijambo rya Biden yavuze ko Amerika n’abafatanyabikorwa bayo “badashobora gutera umugongo Ukraine”, igihugu Washington yoherejemo miliyari z’amadolari y’inkunga ya gisirikare kuva intambara itangiye mu 2022.

Hagati aho Perezida Biden yashimangiye ko Ubushinwa “butazigera buturenga” kandi ko Amerika izakomeza kuba igihugu cy’igihangange ku isi. Yongeyeho ko Amerika yabashije kwunga umubano ukomeye n’Ubushinwa, kandi ko ntacyigeze kiwuhungabanya mu myaka ine amaze ari perezida.

Perezida Biden w’imyaka 82, nyuma yaje gusaba ubuyobozi bwa Trump kuzakomeza politiki y’ingufu zivugurura, avuga ko abahakanaga ihindagurika ry’ibihe ku buyobozi bwa Trump “batari mu kuri na gato” kandi ko “bava mu kindi kinyejana.”
Ijambo rya politiki y’ububanyi n’amahanga rya Perezida Biden, rizakurikirwa n’ijambo ryo gusezera, azageze ku banyamerika ari mu biro bye, kuwa gatatu.