Muhanga : Dr Habineza yemereye abaturage uruganda rutunganya amabuye y’agaciro

Umuyobozi w’ishyaka riharanira Demokarasi no kurengera ibidukikije akaba na Kandida ku mwanya wa Perezida wa Repubulika Dr Frank Habineza, yabwiye abaturage ba Muhanga ko naramuhanga atowe azashyiraho uruganda rutunganya amabuye y’agaciro, bayongerera agaciro ndetse no gutanga akazi ku rubyiruko.

Ibi yabitangaje kuri uyu wa 9 Nyakanga 2024 ubwo yiyamamazaga mu KARERE ka Muhanga.

Dr Frank Habineza avuga ku bucukuzi bw’amabuye y’agaciro aboneka mu KARERE ka Muhanga uburyo acukurwa mu kajagari, bigatuma abaturage bamwe bahasiga ubuzima ndetse bikangiza n’ibidukikije, yabwiye abanya Muhanga ko nibabagirira icyizere bazashyiraho uruganda rutunganya amabuye y’agaciro bikazatuma akajagari no kwangiza ibidukikije bivaho.

Ati :”Gushyiraho uru uruganda bizayongerera agaciro binatange akazi ku baturage”

Avuga ko izi nganda zitazagarukira muri aka KARERE gusa zizakomeza muri buri KARERE ahari umurenge acukurwamo ayo mabuye uruganda ruzashyirwa muri uyu murenge.

Ikindi kibazo cyagaragaye muri aka KARERE ni icy’abaturage batarahabwa ingurane ubwo hakorwaga umuhanda Muhanga Karongi.

Dr Habineza yavuze ko nibabagirira icyizere bazahindura itegeko rirebana n’ingurane ndetse n’indishyi zihabwa ahashyizwe ibikorwa bya leta mu butaka bw’abaturage. Yavuze ko hazavugururwa iri tegeko buri muturage agahabwa indishyi ikwiye Kandi ku gihe inajyanye n’ibiciro biri ku isoko.

I Muhanga Aho Dr Frank Habineza yiyamamarije niho akomoka, abaturage bari bitabiriye ibi bikorwa Ari benshi cyane.