Loni yanze gukuraho ibihano yafatiye imitwe yitwaje intwaro ikorera muri RDC

Akanama k’Umuryango w’Abibumbye gashinzwe umutekano kagumishijeho ibihano kafatiye abo mu mitwe yitwaje intwaro ndetse n’abandi bashinzwe umutekano bakorera muri Repubulika Iharanira Demokarasi ya Congo (RDC). Ibi byemezo byafashwe tariki ya 1 Nyakanga 2024, nk’uko byatangajwe na Ambasade ya RDC muri Loni, bizamara umwaka umwe kugeza tariki ya 1 Nyakanga 2025.

Ibihano byagumishijweho birimo gukumira ubugure bw’intwaro, kubuzwa gukora ingendo mu mahanga no gufatira imitungo. Abarebwa n’ibi bihano ni abantu 44 ndetse n’imitwe icyenda ikorera muri RDC. Aka kanama kasabye abateganya kugurisha intwaro n’ibindi bikoresho inyeshyamba ndetse n’ibigo by’umutekano bikorera muri RDC, kubanza kubimenyesha kugira ngo inzira zinyuramo zifungwe.

Nk’uko akanama ka Loni kabisobanuye, ibi bihano byibanda ku batari muri Leta ya RDC ndetse n’ibigo bigira uruhare mu guhungabanya amahoro, ituze n’umutekano muri RDC. Yagize ati: “Iyi ngamba yo kwinjiza ibikoresho bya gisirikare ndetse n’ubufasha ntabwo ireba igisirikare n’inzego z’umutekano za Leta ya RDC.”

Akanama kandi kafashe icyemezo cyo kongerera manda y’umwaka umwe impuguke za Loni zikurikiranira hafi umutekano muri RDC no mu karere k’ibiyaga bigari, zunganira komite ya Loni ishinzwe gufata ibihano.

Leta ya RDC na yo yigeze kuba ku rutonde rw’abafatiwe ingamba mu kugura intwaro kugeza mu Ukuboza 2022, nyuma yo gutakamba igaragaza ko bituma itabasha kugura intwaro zihagije. Icyo gihe, yari igikomeje guhangana n’umutwe wa M23.

Akanama ka Loni kari kafashe iyi ngamba kubera ko bamwe mu basirikare bakuru muri RDC bashinjwaga guha imitwe y’inyeshyamba intwaro, Leta iba yaguze, igakoresha mu bugizi bwa nabi bwibasira abasivili n’imitungo yabo.

Nubwo Leta ya RDC yakuriweho ibi bihano, ingabo zayo zakomeje gukorana n’imitwe yitwaje intwaro yagize uruhare mu byaha byibasira abasivili mu burasirazuba bw’igihugu, harimo ihuriro Wazalendo ryari ryarashyiriweho guhangana n’abarwanyi ba M23.