Ituze ryagarutse ku wa mbere mu mujyi wa Uvira mu ntara ya Kivu y’Epfo nyuma y’imirwano yabaye ku cyumweru yiciwemo abantu 12, abasivile n’abasirikare, nk’uko bivugwa na Radio Okapi.
Iyo mirwano yabaye hagati y’abasirikare ba leta, FARDC n’itsinda ry’abarwanyi bazwi nka Wazalendo.
Ku cyumweru, ku mbuga nkoranyambaga hakwirakwiriye amafoto yafashwe n’umwe mu ngabo za leta agaragaza uko itsinda rye ryashegeshwe n’imirwano hagati yabo na Wazalendo.
Umwe mu batuye mu mujyi wa Uvira yabwiye Rwandanews24 ku mugoroba wo kuwa mbere ko muri uyu mujyi “hari umutekano mucye”. Yagize ati: “Wazalendo na FARDC barimo kurwana, Wazalendo basabye ibikoresho ngo barwane na M23 FARDC na yo yabimye ibikoresho, bituma ejo [ku cyumweru] barwana”.
Uyu mugabo utifuje gutangazwa amazina, yongeraho ati: “Nyuma yaho uyu munsi [ku wa mbere] habaye agahenge gatoya, [ariko] mu muhanda nta modoka, nta bantu batambuka mu muhanda, urebye nta kigenda nta mahoro ahari.
“Amashuri yafunze, ubucuruzi bwafunze, abantu bafite ubwoba.”
Serge Kigwati ukuriye sosiyete civile muri ako gace nawe yemeje ko imirwano muri Uvira yatewe no kuba Wazalendo barashatse kwambura intwaro abasirikare ba FARDC bahunze bava i Bukavu. Maze FARDC babyanga bikavamo kurasana.
Umujyi wa Uvira ni umujyi wa 2 mu bunini muri Kivu y’Amajyepfo. Uri ku nkengero z’ikiyaga cya Tanganyika ku birometero 25 uvuye Bujumbura mu Burundi
Kigwati avuga ko ku wa mbere hagarutse ituze nyuma y’imirwano yabaye ku cyumweru, nubwo yemeza ko ibintu bikifashe nabi muri uyu mujyi wa kabiri munini mu ntara ya Kivu y’Epfo.
BBC ivuga ko hari wayihamagaye avuga ko muri Uvira “nta buyobozi bugihari, hasigaye izina ry’ubuyobozi urebye, barahunze bagiye i Kalemie abandi bagiye i Bujumbura”.
Abategetsi b’intara ya Kivu y’Epfo bakoreraga i Bukavu bizwi ko mbere y’uko uyu mujyi ufatwa mu mpera z’icyumweru gishize bahungiye i Uvira, ibyo uyu muturage yavuze ko bakomereje i Kalemie na Bujumbura BBC ntiyabashije kubigenzura mu buryo bwigenga.
Amakuru atandukanye avuga ko abarwanyi ba M23 bakomeje kumanuka bava i Bukavu basatira umujyi wa Uvira, ibyo aba barwanyi bo bataremeza 100% ariko bagahamya ko byabaye ngombwa ko bahagarika ibyo gusubiranamo ubundi bakitegura urugamba na M23.
Amashusho amwe yashyizwe ku mbuga nkoranyambaga yerekana abaturage b’ahitwa Panzi mu majyepfo ya Bukavu bakira aba barwanyi. Andi mashusho yafashwe n’abaturage yerekana abo barwanyi abaturage bavuga ko bageze ahitwa Nyangezi ku nzira yerekeza i Uvira.
Uvira ni umujyi uri ku kiyaga Tanganyika, uri kuri kilometero 25 uvuye i Bujumbura mu Burundi wambukiye ku mupaka wa Gatumba.
U Burundi buvuga ko mu cyumweru gishize gusa kuva ku wa gatanu kugeza ku cyumweru bwakiriye impunzi zigera ku 10,000 zajyanywe mu nkambi z’agateganyo ziri mu ntara za Cibitoke na Bubanza mbere yo kwigizwa kure y’umupaka nk’uko amategeko abiteganya. Minisitiri w’ubutegetsi bw’igihugu mu Burundi yavuze ko muri izo mpunzi bagomba “kuvangura abasoda n’abasivile baba babarimo”.