Ubwato bwari butwaye abakinnyi b’umupira w’amaguru bwarohamiye mu Mugezi wa Kwa uherereye mu Ntara ya Maï-Ndombe muri Repubulika Iharanira Demorakasi ya Congo, 25 barapfa.
Umuvugizi w’Intara ya Maï-Ndombe yabereyemo iyi mpanuka, Alexis Mputu, yatangaje ko iyi mpanuka yabaye mu ijoro ryo ku wa 10 Werurwe 2025. Yavuze ko abakinnyi bari bavuye gukina mu Mujyi wa Mushie.
Yagize ati “Ubwato bwavuye ku cyambu ahagana Saa Tanu z’ijoro ndetse navuga ko ubwato bwataye umurongo,”
Yakomeje avuga ko ibyateye iyi mpanuka ari ukubera kugenda nijoro cyane. Ikindi ni uko ubwo bwato butari bufite amatara ahagije yo kureba mu ijoro.
Amakuru yatanzwe n’umuyobozi wo mu nzego z’ibanze muri aka gace, yatangaje ko abantu 30 barokotse iyi mpanuka yahitanye abantu benshi.
Impanuka z’ubwato zikunze kugaragara muri RDC kubera ko ari bwo bakunze gukoresha bambuka imigezi yo muri iki gihugu.
Mu Ukuboza kwa 2024, habaye indi mpanuka y’ubwato aho bwari butwaye abantu barenga 100 bukarohama mu mugezi wa Fimi, hapfiramo abantu 25 abandi benshi baburirwa irengero.