Ikipe ya, APR FC yatangaje ko Taleb Abderrahim nk’umutoza mukuru wa yo mu myaka ibiri iri imbere.
Ubuyobozi bw’ikipe y’Ingabo, bwatangaje ko azungirizwa n’abarimo Chahid Mohamed na Haj Taieb Hassan.
Abderrahim Taleb ni izina rinini kuva mu 2007, cyane ko yatoje amakipe akomeye arimo RS Berkane, AS FAR na Wydad Athletic Club zo muri Maroc.
Uyu mutoza ufite impamyabushobozi y’ubutoza ya CAF Pro na UEFA Pro, yaherukaga gutoza Difaâ Hassani El Jadidi yo muri Maroc mu mwaka w’imikino wa 2022/23 mu gihe akazi aheruka ari ak’Umuyobozi wa Siporo muri RCA Zemamra.
Muri iyi kipe y’Ingabo z’Igihugu, Talen agiye gusimbura Umunya-Serbia Darko Nović wari umaze amezi 11 ayitoza, wagiye habura imikino itatu ngo shampiyona irangire.
Kugeza ubu APR FC yaguze bamwe mu bakinnyi bashya b’Abanyarwanda ari bo Hakizimana Adolphe, Iraguha Hadji, Bugingo Hakim na Ngabonziza Pacifique.
Ikipe y’Ingabo iri mu biganiro na Omborenga Fitina, ndetse izagura abakinnyi babiri b’abanyamahanga biyongera ku Umunya-Uganda, Ronald Ssekiganda, wasinye muri Mutarama.
Abandi babiri ni rutahizamu ukina imbere n’undi mukinnyi ukina inyuma ye ahazwi nko ku 10.
